Vit fóru úr Leynum til Kvívíkar, og síðani ætlaðu vit at fara eftir bygdagøtuni úr Kvívík til Vestmannar. Veðrið var gott og fínt sýni, tá ið vit løgdu avstað úr Kvívík. Vit mettu um, 

hvussu leingi hesin teinur fór at taka, og tonktu at hetta skuldu vit lættliga klára. Men ikki gongur altíð sum prestur prædikar. Vit gingu okkum inn í kjaftsvartan mjørka, og illveður brast á. Ikki nokk við hesum, vit mistu eisini varða gøtuna burtur. Vit royndu alt vit vórðu mentir at fáa hóming av hvar vit vórðu staddir, men hetta gekk strýggi, vit vórðu so at siga seinkaðir. Vit hoyrdu enn bilar koyra á vegnum, sjálvt um vit ongan veg sóðu, so vit vistu, at vit kundu finna oman aftur á vegin. Góði hugburðurin byrjaði at dala, og vit ivaðust, um vit skuldu fara oman á vegin ella blíva við at royna at finna varðagøtuna aftur. Vit tosaðu saman, og samtyktu, at tað var ein meira spennadi túrur at fara eftir haganum. Lukkutíð komu vit aftur á røttu kós og funnu varðagøtuna aftur. Enn var øgiliga keðiligt veður, og tjúkt í mjørka. Vátir og kaldir bardu vit okkum frá varða til varða. Júst tá ið hetta ikki tyktist at taka nakran enda, hómaðu vit Vestmanna bygd í mjørkanum. Hetta er fyrstu og síðstuferð at vit nakrantíð fara at frøðast um at síggja Vestmanna bygd.

Sungu H71-sangir

Gleðin í okkum tá ið vit sóðu Vestmanna bygd, kann ikki lýsast við orðum. Vit sungu og róptu H71 sangir allanvegin oman í bygdina. Vit vórðu ei kaldir meir, og hugsavnaðu okkum nú um dystin.

Samanumtikið lærdu vit nógv av hesi ferð, serliga løgdu vit til merkis, hvussu stóran týdning varðarnir hava, eisini er virðingin hjá okkum fyri náttúruni vaksin nógv "náttúran kann ikki undirmetast". So var tað eisini ein ótrúlig kensla, tá Peter Krogh setti prikkin yvir i-ði, tá ið hann vann okkum dystin. Alt í alt var hetta dagur í viku, tað verður seinur dagur, tá vit einaferð gloyma hendan túrin. 
 
Sakir, Pauli j, Pauli m, Ragnar og Àri
19/04/17

---

Heimasíðan takkar fyri frásøgnina.

Nakar vestmenningur?

Nú verður spennandi at vita, um nakar vestmenningur fer undir sama bragd leygardagin, tá VÍF kemur í Hoyvíkshøllina til seinna finaludystin. Kanska onkur (grót)harður vestmenningur...

Sjálvandi velst um veður og umstøður - ongin orsøk at taka óráð fyri. Men hugskotið er við hesum farið til Vestmannar   ;)