Í kvøld klokkan 18 skal besta mansliðið til Kollafjarðar at spæla ímóti KÍF, sum er eitt av trimum liðum, ið kappast um at koma í hálvfinalurnar, har VÍF og H71 longu hava tryggjað sær sess.

H71 er næstfremst við 23 stigum, sum eru trý færri enn oddaliðið, VÍF. Síðani koma Neistin við 17, KÍF við 16 og Team Klaksvík við 14 stigum, og hóast tey bæði fyrrnevndu liggja betur fyri og hava spælt ein dyst minni enn klaksvíkingar, er als einki avgjørt.

Fyri H71 hevur tað eisini nógv at siga, at eitt gott úrslit fæst í Kollafirði í kvøld, tí enn er møguleiki at vinna grundspælið. Teir báðir fyrru dystirnir ímóti KÍF eru endaðir við H71-sigri – fyrst 24-22 í Kollafirði í oktober og síðani 29-23 í Hoyvík í november.

Hinir báðir dystirnir hetta umfarið eru eisini í dag, og teir eru Kyndil-StÍF klokkan 16 og Neistin-VÍF klokkan 18.