Ikki kann sigast, at Rúni er nakað ókent andlit í H71-høpi, tí umframt at vera ein brennandi stuðul og fjeppari, hevur eisini eina fortíð í nevndini í eini fimm-seks ár fyrst í hesi øldini – harav sum formaður frá 2003 til 2006.

– Tað er eingin loyna, at eg havi eitt stórt hjarta fyri H71, og sum bæði fyrrverandi nevdnarlimur og formaður veit eg, hvussu strævið tað er fíggjarliga at reka eitt sovorðið felag, sigur stjórin í Pf. Wenzel.

– Hóast eitt hondbóltsfelag sum H71 livir av tí stóra sjálvbodna arbeiðinum, ið verður gjørt, skulu pengar eisini til, og av tí at eg sjálvur veit, hvussu torført tað kann vera at finna stuðlar, vilja vit sjálvandi fegin rætta H71 eina hjálpandi hond.

Rúni Djurhuus leggur aftrat, at av tí at H71 ger eitt ótrúliga gott barna- og ungdómsarbeiði, vil hann fegin vera við til at hjálpa sínum barndómsfelag, tí at nakað verður gjørt fyri børnini og tey ungu, er nakað, honum dámar væl.

Avtalan um høvuðsstuðulin, sum Rúni Djurhuus fyri Pf. Wenzel og Anna Dam fyri H71 skrivaðu undir nú um dagarnar, er galdandi næstu trý árini.