H71 3-liðið er ein blanding av heilt ungum dreingjum 16-spælarum, nøkrum d18-spælarunum og so tveimum ikki heilt ungum monnum, sum gingu á odda, nevniliga Hallur Danielsen og Tróndur Vatnhamar.

Við hesum prakteksemplari av einum eldraráði vann H71 3 í gjár á Neistanum 2, sum var samansett av bæði ungum og tilkomnum leikarum.

H71 3 er sostatt víðari til 2. umfar í Coca Cola-kappingini, og har møta teir H71 2. Hetta verður uttan iva ein undirhaldandi dystur, har nógv stendur uppá spæl hjá H71 2. Tí tapa teir móti H71 3, ádú-ádú, so verður tað seinur dagur at teir fáa tipt Trónd og Hall.

Annars so stóð hetta á portalinum í dag, týsdagur 3. desember:

Coca-Cola kappingin hjá monnunum – tað er steypakappingin í hondbólti – er byrjað. H71 3 hevur vunnið 29-22 á Neistanum 2 og fer tí víðari í 2. umfar av kappingini. Hinir báðir dystirnir í 1. umfari eru KÍF 2-HC Kvívík og StÍF 2-EB. Teir dystirnir skulu verða spældir í seinasta lagi leygardagin 7. desember.

Eina viku seinni, 14. desember, skal 2. umfar vera avgreitt. Í 2. umfari møtast H71 2 og H71 3 og so vinnararnir av teimum báðum dystunum í 1. umfari, sum enn ikki eru spældir.

Í 3. umfari er bara tann eini dysturin, sum er millum vinnararnar av dystunum í 2. umfari. Vinnarin av dystinum í 3. umfari fer so í eitt bólkaspæl saman við teimum sjey liðunum í Atlantic Airways kappingini. Hvussu bólkaspælið fer at síggja út, fáa vit at vita í fyrsta lagi 21. desember.

Finalan í Coca-Cola kappingini er sett at verða leygardagin 9. februar 2014 klokkan 16:00.

Í fjør vann KÍF steypafinaluna 35-26 móti StÍF.