Í kvøld spældu bæði okkara steypalið, og bæði taptu. Fyrri dysturin, sum vit øll helst longu høvdu avgreitt til okkum, endaði heldur óvæntað við, at klaksvíkingar vunnu við tveimum málum. Seinni dysturin (H71-2) endaði við einum greiðum og væntaðum sigri til vestmenningar.

Í fyrra dystinum (H71-1) vóru tvær høvuðsorsøkir til, at stigini fóru til gestirnar. Sjálvt um vit høvdu eina ørgrynnu av 100% málmøguleikum, gekk heilt illa at fáa bóltarnar framvið tí rættiliga stóra málmanninum hjá Team-Klaksvík. Hin orsøkin var, at tað lá reiðiliga væl fyri hjá Bogdani at skjóta mál fyri gestirnar (10 av 14 í fyrra hálvleiki).

Soleiðis er hondbóltur, og soleiðis er steypakapping. Tað ber ikki til at siga, hvussu dysturin fer. Eitt gott var tó við hesum úrslitinum, tað er, at menn nú vita, hvør uppgávan er móti Kyndli í næsta dystinum, sum verður mikukvøldið. Hetta er dystur við “Vinn ella forsvinn”, tó við lítlari krúllu, alt eftir hvussu úrslitið av StÍF og TK verður.

Í seinna dystinum, gekk sum væntað. VÍF vann lættliga. Tvær gamlar kempur vístu at enn eru krotur í teimum, Niels Viggo og Halgir. Teir báðir skutu tey flestu av málunum. Aðrir gamlir kenningar vóru eisini á liðinum: Tróndur, Freddi og Jens í mál. Hesin dysturin endaði 21-29 til VÍF.