Hetta kappingarárið lækkar móti endanum, og nú eru einans 4 dystir eftir í grundspælinum, harav 2 heimadystir.

Og leygarkvøldið verður tann eini av hesum spældur heima í Hoyvíkshøllini.

Tað er sera sannlíkt, at vit koma at møta VÍF í finalu-dystunum, so hesin heimadysturin verður líkasum ein undan-finala. Og tó, tað velst um, hvat liðini bæði leggja í hendan dystin.

Í sambandi við hendan heimadystin er nýggjur leikfaldari gjørdur.

Oddagreinin umrøður hetta at koma í finaluna og sokallaðu "under-dog"-effektina og so eisini tað, at avrikini í ár hava verið ov misjøvn.

Í elektriska stólinum heldur Petur Dahl, at Niklas Højgaard er størsta drama-queen - og so klárar hann ikki ordiliga at svara upp á, hvørjum kvinnu-leikara hann hevur roynt eftir...

Neistin kann í ár hátíðarhalda, at felagið hevur verið til í 85 ár, og Kyndil - nakað yngri - kann hátíðarhalda sín 60 ára dag.

Sunneva Jakobsen, forkvinna H71, hevur eina heilsu til Neistan, og Bergtóra Høgnadóttur, nevndarlimur í H71, ber fram heilsu til Kyndil.

Faldarin verður sum vanligt borðin í øll hús í Hoyvíkshaganum. Men tað ber eisini til at lesa hann her.