Fyrireikingarnar til komandi kappingarár eru langt síðani farnar í gongd - í øllum førum hjá teimum allarflestu, og landskappingardystirnir byrja fyrst í september.

Eins og undanfarin ár verður hjá teimum vaksnu lagt til brots við tveimum sokallaðum stórsteypadystum, einum fyri kvinnur og einum fyri menn.

Dystirnir eru vanliga millum steypavinnararnar og føroyameistararnar frá seinasta kappingarári. Um eitt lið vann greipuna, so sleppur tað liðið, sum var í aðrari finaluni, upp í part.

Spælt verður um Lions-bikarið, og peningurin, sum kemur inn fyri atgongumerkini, fer til eitt vælgerandi endamál, sum Lions Club Føroyar stendur fyri. Hesaferð eru tað samarittarnir hjá Reyðs Krossi, sum fáa ágóðan.

Dystirnir báðir verða spældir í Ítróttarhøllini á Hálsi í Havn sunnudagin 4. september:

Klokkan 17:00 Neistin - VÍF, kvinnur

Klokkan 19:00 VÍF - H71, menn

Atgongumerkið kostar 70 krónur; hevur onkur hug at lata meira, so ber tað tal.