Summi fáa ikki nóg mikið av hondbólti og søkja sær avbjóðingar uttanfyri landoddarnar, tá heimliga kappingin liggur still.

Hálvthundrað hoyvíkingar luttaka í hesum døgum í altjóða hondbólts kapping í Lund í Svøriki. H71 hevur fýra lið við.

Talan er um tí størstu innandura hondbóltskappingina í heiminum, sum svenska felagið Lugi Hondboll skipar fyri.

H71 hevur tvey gentulið og tvey dreingjalið við. Byrjanin hevur verið á góðari leið. Gentur 14 og dreingir 15 hava higartil vunnið allar sínar dystir, og tey hava sostatt kvalifiserað seg til A-endaspælið sum eittari í sínum bólkum.

Dreingir 14 hava møtt tveimun sterkum liðum og hava tapt tveir dystir og vunnið tveir, so teir fara víðari sum eittari í B-endaspælinum.

Gentur 16 hava vunnið ein og tapt ein higartil, og tær skula spæla tveir dystir seinri í kvøld. Hesir dystirnir koma at avgerða, hvar tær skulu spæla víðari.

Tilber at fylgja liðunum á appini ”Lundaspelan Handboll” og her á heimasíðuni hjá kappingini.

Onkrar myndir frá túrinum eru at síggja í myndasavninum her til høgru.