5. apríl 2012
Myndir av liðum 2012
Limagjaldið
STUÐLAFELAGIÐ
Brúk er fyri fleiri limum-/stuðlum
Nú virksemið hjá H 71 er alsamt vaksandi, hevur stuðlafelagið hjá H71 tørv á at fáa fleiri limir, um felagið á nøktandi hátt skal kunna stuðla undir ungdómsarbeiðið hjá H 71.
Skjal at lesa: <Tak niður>
08. mai
Gullveitsla í Hoyvík 16. mai, kl. 19.00
Sanniliga sigi eg tykkum, framtíðin er svørt, so kolasvørt, og summarið er í hondum. Við hesum kemur hiti, uppaftur meiri hiti enn hvat "natúrligt" er, siga tey klóku.
Ikki tí, enn eru ikki so nógvar hálvnaknar damur at gena at, men vit
liva í vónini um alheimsupphiting og lærstuttar kjólar. Men vit hava so felagsins ársveitslu at gleða okkum til, su í ár samtíðis er ein gullveitsla.
Ársveitslan verður mikudagin hin 16. mai, kl. 19.00 (Halgidagur er dagin eftir!).
Veitslan verður sum undanfarin ár, tó við einum undantaki: hon verður hildin í Hoyvíkar skúla. Hini árini hava vit verið í auluni í Hoydølum, og man ikki vit leita okkum oman í hasa perluna eitt annað gott ár. Men í ár hava vit valt at toga H71sa gullveitslu tættari at Hoyvíkini og hoyvíkingum, tættari at fólkinum, um tú vilt.Hetta, tí vit ætla okkum uppaftur fleiri fólk og meiri feginskap.
Kostnaður fyri ársveitsluna, sum í ár er ein óblandað gullveitsla, er 200 krónur fyri persónin pluss ein rætt fyri ”húskið”.
Veitslan verður nevniliga skipað sum í fjør, eitt samanskotsgildi.
Upphæddin skal flytast á konto 9865-417.997.2 í Norðoya Sparikassa;
vinarliga viðmerk navn og "ársveitsla".
Evstamark fyri tilmelding er sunnudagin hin 13.mai.
Ársveitslan er treytað av, at nóg nógv tekna seg, so vit heita á allar H71arar, øll tykkum, ið vóru við til finalurnar og viðhaldsfólk og stuðlar annars, um at koma til rimmar gullveitslu hjá H71, okkara felag í Hoyvík.
Lat meg bara endurtaka. Veitslurnar higartil, tey seinastu árini, hava verið stuttligar og samansjóvandi, og er ársveitslan fyri allar hoyvíkingar, nýggjar sum gamlar og mitt-ímillum-gamlar. So lokkið tykkara næsta og hvønnannan við! Tað verður øgiligt.
Við vón um stórsligna tilmelding og óføra gullveitslu,
Nevndin
Video-klipp av seinastu løtutini í 3. finaluni: http://www.youtube.com/watch?v=Oy0Yo4DJ9zY&feature=youtu.be
30. apríl
Bogdan Florea heldur fram í H71
Hóskvøldið longdi H71 sáttmálan við Bogdan Florea, og hervið fer samstarvið inn í sítt triðja ár.
Serstakliga seinasta leikárið hevur Bogdan víst sítt virði, fyrst og fremst sum stórskjútti á vinstra bakki. Sum viðhaldsfólk plaga at taka til eftir ein av hansara dundurskotum: “Hann skjýtur, sum hestur sparkar”. Tað er væl nakað um tað.
Afturat hesum hevur hann roynt seg sum venjara við avbera góðum úrslitum. Eitt nú vunnu bæði hansara lið FM, d12 a og d12b.
Bogdan er farin at støðast í Hoyvíkini, og við hesum rokna vit við, at hann fer at avrika hvaðna betur næsta kappingarár, tað veri seg sum spælari og venjari, í hvørs leikluti hann fær ein hjálparvenjara ella tveir. Ein politikkur, vit nutu væl av í fjør, og ætla at endurtaka.
H71 takkar tí Bogdan fyri farna gullár við vón um meira av tí sama til næsta kappingarár.
Nevndin
28. apríl
Ári Egason Dam nýggjur málmaður hjá H71
Eftir meistaraheitið og frálíka kappingarárið 2011/2012 er gerandisdagurin so smátt byrjaður aftur, og nevndin í felagnum er farin undir fyrireikingarnar til komandi kappingarár.
Fyrst og fremst skulu vit hava venjaraspurningin uppá pláss, men um somu tíð fyrireika vit hópin til komandi kappingarár.
Væntandi halda teir flestu av føroyameistarunum fram. Vit vita tó, at málmaðurin, Hanus Kristiansen, skal av landinum. Hann fær tí ikki verið við komandi kappingarár. Í hesum sambandi vil H71 nýta høvi at takka Hanusi fyri hansara íkast og ynskja honum góðan byrð, og við vón um, at hann skjótt verður at síggja aftur.
Samtíðis kann H71 boða frá, at nýggjur í málmanstoyminum hjá H71 er Ári Egason Dam. Ári er, umframt at vera sera dugnaligur málmaður og landsliðsspælari, ein óføra dámligur og skilagóður maður.
Vit í H71 eru ovurfegin um, at Ári nú kemur til Hoyvíkar at royna seg. Vit ynskja honum við hesum hjartaliga vælkomnan til H71.
24. apríl
H71 ynskir Neistanum til lukku við føroyameistaraheitinum.
H71 ynskir hervið Neistanum hjartaliga tillukku við meistaraskapinum hjá kvinnum 2011/12.
Ein sannførandi sigur við spæli, ið tænir føroyskum hondbólti. Sanniliga, einum meistara verdugt.
24. apríl
Takk!
Ein risastór tøkk til H71sa heilt frágera góðu viðhaldsfólk. Uttan tykkum, skal eg heilsa frá venjarum sum spælarum, hevði hetta slettis ikki borið til. Tit sóu til eitt ógloymandi hondbóltsupplivilsi, eitt søguligt upplivilsi, sum KÍF eigur sín stóra lut í.
Tí eisini takk til KÍF fyri tríggjar super dystir. Ein finala, har hondbólturin bleiv tann endaligi vinnarin. Eitt finaluumfar, ið ítróttar-Føroyar í álvara hevur lagt sær í geyma.
Tit H71-fjepparir, tit vóru øgiligir í Vestmanna Skírisdag, finalan fyri at koma í finaluna. Og fyri alt finaluumfarið vóru tit fyri liðnum sum, ja, Messi fyri Barcelona ella Jesus fyri Nýggja Testamenti--ein ósundurskiljandi stuðul, sum vit øll fara at seta okkara álit á aftur til næsta ár... tit eru vit, og uttan tykkum ber onki til:)
Eisini vil H71 koma við eini inniligari tøkk til Kára Sørensen fyri at koyra okkara fesku føroyameistarar við sløkkiliðsbilinum til Hoyvíkshøllina. Hetta gjørdi móttøkuna av nýkosnu meistarunum bara tað festligari. Eitt ógloymandi upplivilsi, serliga øll ungfólkin, sum saman við foreldrum gjørdu sær tann ómak at fagna hesum megnaravriki.
Leikarir, venjarir og nevnd
22. apríl
H71 er føroyameistari 2012
Fyrst og fremst fara vit at takka KÍF fyri tríggjar frálíka góðar dystir. Tíverri er spælið soleiðis at bert ein kann vinna, men javnari kann tað ikki blíva, og slíkir spennandi dystir koma ikki fyri aftur í 100 ár.
Øll eru vælkomin í Hoyvíkshøllina har vit heiðra leikurunum, og hugna okkum saman við teimum. Har er longu opið.
Video-klipp av seinastu løtutin:http://www.youtube.com/watch?v=Oy0Yo4DJ9zY&feature=youtu.be
Yvirskipað um tríggjar finaludystir
Hetta vóru ikki vanligir hondbóltsdystir, hesir tríggir finaludystirnir. Teir vóru reiðiliga líkir, tann fyrsti harðastur, tann næsti eitt sindur minni harður og tann triði harður, men bleytastur av trimum. Hetta var styrki móti styrki, eitt øgiligt orkubrúk og ein seiðpíning í trimum umførum, sum til seinast lat H71 liggja omaná. Hetta var ikki vakurt, men ein góð mynd av tveimum liðum, sum til seinast løgdu allar kreftir í at náa einum settum málið
Úrslitini tala fyri seg 20-21, 22-21 og 20-21, so tætt at tættari ber ikki til.
Troyttir menn
Tað sigur seg sjálvt at menn vóru troyttir, teir hava jú givið alt tað teir høvdu. Hetta sást eisini aftur í dag. Orkan sýntist eitt sindur meir hjá H71 og kom hetta helst av betri orkunýtslu, tað bleiv skift meiri út, og slitið javnað á fleiri spælarar.
Dysturin í dag
Sjálvur dysturin og úrslitið gjørdi at ilt er at siga nakað konkret um sjálvan dystin. Hann var als ikki ólíkur hinum. Tey flestu vóru samd um at H71 var betra liðið í dag. Verjan stóð sum ein skansi, og tað var har vit vunnu. Tað sømir seg ikki at tosa um annað enn liðavrik og allir menn vóru fantastiskir í dag.
At toppa
Soleiðis, sum kappingin er skrúvað saman, so eru tað tvey tey bestu liðini, sum bresta saman í einum finaluumfari. Tí ræður um at verða best tá tað ræður um at verða best. Tað var hetta vit vór vitni til í dag. Kollfirðingar hava verið bestir alt árið, men H71 vóru bestir júst nú. Hetta prógvaðu vit í dag.
Tillukku dreingir
Hjartaliga tillukku við føroyameistararskapinum dreingir, tillukku til røsku viðhaldsfólkini og tillukku H71.
