Sum kunnugt hevur Hákun sínar hondbóltsrøtur her í H71, og longu í fjør tryggjaði hann sær – bara 18 ára gamal – pláss sum høgrivongur í bestu deildini hjá Skanderborg Håndbold.

Hákun gjørdi fyrst ein styttri sáttmála við Skanderborg Håndbold í fjør, men stóð seg so avbera væl, at sáttmálin stutt eftir varð longdur til 2024.

Á jólum var Hákun West av Teigum fyri fyrstu ferð við til venjingar hjá føroyska A-landsliðnum, og í landsliðshøpi hevur hann longu gjørt vart við seg sum ein av U17-spælarunum, sum á sumri í 2019 vunnu European Open-kappingina í Göteborg.

Nú heiðurin Ítróttar-Stjørnuskotið 2020 stendur fyri framman, er Hákun í uppskoti saman við 17 ára gamla fótbóltsspælaranum, Samuel Johansen Chukwudi, og 16 ára gamla fimleikaranum, Astrið Nanly Breckmann.

Við heiðrinum, sum verður handaður leygarkvøldið 13. februar, fylgja eisini 5.000 krónur.