Seinni í hesum mánaðinum, 19. og 20. mars, skal føroyska kvinnulandsliðið spæla dystir í HM-undankappingini ímót ávikavist Hvítarusslandi og Sveis.

Dystirnir verða spældir í hvítarussiska høvuðsstaðnum, Minsk, har Føroyar fríggjadagin 19. mars klokkan 13 spæla ímóti Hvítarusslandi og leygardagin 20. mars klokkan 11 spæla ímóti Sveis.

Tvey av hesum trimum liðunum koma víðari úr bólkinum og skulu spæla sokallaðan “play-off”-dyst ímóti liðum, sum eru styrkismett hægri.

Landsliðsvenjararnir, Dragan Brljevic og Julian Johansen, hava tikið út 15 spælarar til hesar báðar dystirnar, og her í H71 kunnu vit fegnast um, at ikki færri enn fýra av “okkara” spælarum eru slopnir upp í part.

Tríggir av spælarunum eru núverandi H71-spælarar, Durita Toftum Joensen, Marita Mortensen og Maria Halsdóttir Weyhe, og sum málverji er úttikin Annika Fríðheim Petersen, sum nú spælir í bestu íslendsku deildini við felagnum, Haukar.