Tað byrjaði annars so væl hjá H71-kvinnunum, sum í høllini á Skála beinanvegin løgdu seg á odda. Og hóast málini vóru fá ta fyrstu løtuna, var tað H71, sum bygdi uppá og sá út til at leggja lunnar undir ein sigur, tá ið hálvleiksleiðslan var 13-9.

Í seinna hálvleiki økti H71 upp í 17-10, men kortini slapp StÍF spakuliga innaftur í dystin og megnaði at koma upp á javnt, so tá ið teir 60 minuttir vóru farnir, stóð á jøvnum 19-19.

Dysturin skuldi avgerast, so spælast skuldi umdystur upp á tvær ferðir fimm minuttir. Eisini her megnaði StÍF betur at ríða á viðgongdini, og hóast H71 svaraði væl aftur, gjørdist einki, tá StÍF fá sekund fyri dystarlok skoraði til 23-22.

Sostatt eru strandakvinnur komnar í FM-finaluna, sum verður ímóti vinnaranum av triðju hálvfinaluni hóskvøldið millum Kyndil og Neistan, meðan okkara kvinnur leygardagin skulu spæla um bronsuna ímóti taparanum. Tað gekk altso ikki hesaferð, men eingin ivi skal vera um, at H71 kemur sterkt aftur!

StÍF-H71 23-22 (9-13)

Málskjúttar: Maria Halsdóttir Weyhe 8, Marita Mortensen 6, Jana Mittún 4, Elsa Egholm 3, Eva Barba Arge 1