Ovurfegnir hoyvíkingar og H71-fjepparar kundi leypa inn á vøllin, tá ið Sveinur Olafsson við seinasta kastinum í brotskastskappingini skoraði til 34-33, tá ið hann púra kaldur sendi bóltin fram við Mladen í VÍF-málinum.

Undan tí hevði bjargað brotskastinum frá Leivi, og Ári bjargaði skotinum frá Jojic og trýsti Magnus Müller til at skjóta uppum, so tað stóð á jøvnum 33-33, áðrenn Sveinur altso fekk seinasta skotið og orðið at siga í Hoyvíkshøllini í kvøld.

Dysturin í Hoyvíkshøllini livdi annars til fulnar upp til alt tað, tú kanst vænta tær og krevja av einari ordans finalu. Har av spenningur og dramatikkur til tað seinasta – og tíbetur stóð H71 eftir sum vinnari, tá ið avtornaði.

Minst tvær finalur aftrat

Í vanliga dystinum gekk tað upp og niður hjá báðum liðum, men hvørki vildi sleppa hinum avstað, og tí var spenningurin alla tíðina til staðar. Tað endaði 26-26, men við eitt sindur av hepni kundi H71 vunnið 27-26, tá ið ein ókeypis møguleiki stakk seg upp í allarseinastu sekundunum.

Í umdystinum skoraðu liðini tvær ferðir í hvørjum hálvleiki, so tað stóð 30-30. Javnari kundi tað ikki verið, eftir teir 70 minuttirnar av tøttum hondbólti og tey tíggju brotskøstini – og søtari verður tað ikki at vinna, enn tað var júst hesaferð, tí hetta var barasta so avgerandi!

Nú skulu hoyvíkingar leygardagin klokkan 16 spæla triðju finaluna í Vestmanna og síðani taka ímóti vestmenningum í Hoyvíkshøllini mikukvøldið klokkan átta. So er at vóna, at smakkurin av sigri er so søtur, at skonkt verður aftur tvær ferðir upp í slag!

FM-finala 2: H71-VÍF 34-33 (eftir umdyst og brotskastskapping)

Vanligi dysturin 26-26 (15-13), umdystur 30-30 (28-28)

Málskjúttar: Pætur Thomsen 9, Sveinur Olafsson 7, Leivur Mortensen 6, Peter Krogh 5, Janus Dam Djurhuus 3, Baldur Gillason 1, Bogi Hansen 1, Rúni Vest Højgaard 1, Ragnar Karlsson 1

(Myndina hevur Jens Kr. Vang tikið)