Fjórða FM-finalan ímóti VÍF gjørdist ikki tann avgerandi vendin, vit høvdu vónað, so vit kanska fingu ein møguleika at avgera alt í Vestmanna leygardagin. Í staðin endaði tað við einum sera tryggum sigri til vestmenningar, ið sostatt fóru avstað við gullinum.

Ikki tí, tað er ikki óuppiborið, at VÍF stendur eftir sum meistari, tí innanhýsis í grundspælinum høvdu vestmenningar betri tak á H71, og tað sama var eisini, nú FM-finalurnar vóru á skránni. Bara í aðru og triðju finaluni og í fyrra hálvleiki í hesi fjórðu eydnaðist at geva teimum gulu og bláu dygga mótstøðu.

Fyrri hálvleikur var javnur og endaði 14-13 til okkara fyrimun, og enntá eydnaðist at útbyggja leiðsluna eftir steðgin. Men so setti VÍF ferð á og hugdi ongantíð aftur um seg aftur. Brádliga var støðan 22-17 til VÍF, ið enntá seinastu fimm minuttirnar økti leiðsluna upp í tíggju mál.

Soleiðis endaði hetta kappingarárið í Burn-deildini við, at menninir fingu silvur. So har er ikki annað at gera, enn at spíla seg enn meira út til næsta kappingarár. At tað kann bera til, megnaðu bæði kvinnurnar og menninir at vísa í steypakappingini, so sjálvandi trúgva vit upp á tað.

H71 ynskir StÍF-kvinnunum og VÍF-monnunum VÍF hjartaliga tillukku við FM-heitunum!

FM-finala 4: H71-VÍF 24-34 (14-13)

Málskjúttar: Peter Krogh 7, Djóni Gaard Joensen 5, Pætur Thomsen 4, Ragnar Karlsson 3, Janus Dam Djurhuus 2, Sigmundur Dahl 1, Rúni Vest Højgaard 1, Leivur Mortensen 1