Hóast H71 vann steypafinalurnar hjá bæði kvinnum og monnum, umframt at menninir komu í FM-finalurnar, gjørdist tað ikki til tað heilt stóra, ið fall í okkara lut, tá ið ársins bestu vórðu heiðrað í gjárkvøldið.

Peter Krogh gjørdist ársins verjuspælari hjá monnum og kom eisini á ársins lið hjá monnum sum høgri bakkur, og har kom somuleiðis Pætur Thomsen sum høgri vongur. Hjá kvinnunum var Jana Mittún heiðrað sum ársins stjørnuskot, og harumframt kom hon eisini á ársins lið hjá kvinnum sum høgri vongur.

Bæði hjá kvinnum og monnum vóru fleiri av okkara spælarum milum teir fremstu, so vit hava tó einki at skammast við, nú tey bestu skuldu heiðrast, tí vit vóru í fleiri førum við allan vegin. Vit ynskja okkara og øllum hinum, ið vórðu heiðrað, hjartaliga tillukku!

Hondbóltssambandið skipaði fyri heiðurstiltakinum í høvuðssætinum hjá BankNordik í Havn, og tað varð avgreitt undan stóru gallaveitsluni, sum var í Dansifrøi.