Miðskeiðis í juni mánaði stóðu U19-kvinnurnar hjá Føroyum seg sera væl í Euro Championship-kappingini í Norðurmakedonia, har tær komu heilt til bronsudystin – umframt at tær vóru einasta lið, ið koppaði Hollandi, sum endaði við at vinna kappingina.

Ta ferðina vóru ikki færri enn sjey H71-spælarar í hópinum, og nú U17-landsliðið mikudagin fer av landinum til Georgia at spæla eina tilsvarandi kapping, hava landsliðsvenjararnir, Simon Olsen og Magni Thomsen, millum teir 16 spælararnar ikki færri enn seks H71-arar!

Okkara spælarar, sum síggjast á myndini omanfyri, eru Inga Maria Roysdóttir, Anna Elisabeth Halsdóttir Weyhe, Simona Michelsen Kass, Poula Fríðheim Petersen, Karina Debes Heinesen og Karin Egholm.

Tilsamans eru seks dystir á skránni hjá U17-kvinnulandsliðnum, ið spælir kappingina í georgiska høvuðsstaðnum, Tblisi, har føroysk landslið áður hava fingið góð úrslit, so vit eru øll sera spent at fylgja við, hvussu gongur. Onga løtu ivast vit heldur í, at tær allar fara at gera sítt allarbesta.

Dystarskráin hjá kvinnunum sær soleiðis út:

• Fríggjadagin 6. august kl. 11.30 Føroyar-Serbia

• Mánadagin 9. august kl. 14.00 Italia-Føroyar

• Hósdagin 12. august kl. 11.30 Føroyar-Estland

• Fríggjadagin 13. august plaseringsdystir

• Sunnudagin 15. august plaseringsdystir