Helgi Hildarson Hoydal hevur síðani á sumri 2018 verið knýttur at norska felagnum, Viking, sum er heimahoyrandi í Stavanger, og hevur hann higartil spælt 57 dystir fyri Viking og skotið 190 mál.

Farna kappingarár spældi Viking í bestu deildini, men mátti eftir tveir dystir ímóti Natterøy flyta niður í næstbestu norsku deildina. Men Helgi kennir væl til Drammen HK frá bestu deildini og hevur fleiri ferðir spælt ímóti komandi mótstøðuliðnum hjá H71.

– Hetta er eitt lið, sum hevur bjóðað av í toppinum í bestu norsku deildini seinastu árini. Drammen HK hevur navnframa Kristian Kjelling sum venjara, og hevur góðar spælarar á øllum plássum, sigur Helgi, sum er liðskipari hjá Viking og heldur fram hóast niðurflytingina.

Nógvar pengar

– Drammen HK endaði á triðja plássi farna kappingarár, men setur sær hægri mál. Men hóast liðið er gott, verður stuttligt at síggja, um hoyvíkingar klára at geva teimum ein skarpan gang.

Strikuspælarin á føroyska hondbóltslandsliðnum leggur aftrat, at Drammen HK er eitt lið, sum er eitt sindur umstrítt og at ikki øllum dámar tað líka væl.

– Har eru nógvir pengar og Drammen HK verður av mongum sæð sum eitt keypifelag, sigur Helgi Hildarson Hoydal at enda við H71-heimasíðuna.

Sum skilst, verður talan ikki um endurtøku av avtaluni í fyrraárið, tá ið H71 fekk báðar dystirnar til Føroya, so hesaferð verður heimadysturin hjá monnunum spældur í Føroyum og útidysturin í Norra.