Tvey ár eru liðin, síðani føroyska U17-landsliðið í manshondbólti tók mong á bóli við at vinna European Open-kappingina, sum var í Göteborg í Svøríki – enntá við at smyrja svensku vertirnar av í sjálvari finaluni.

Nú eru U17-menninir sjálvandi tvey ár eldri og nógvar royndir ríkari, og nú eru teir bulurin á U19-landsliðnum, sum í dag leggur til brots í tí fyrru av tveimum kappingum uttanlands henda mánaðin.

Hesaferð eru 12 av teimum 16, ið vunnu fyri tveimum árum síðani, við í hópinum, sum landsliðsvenjararnir Mark Lausen-Marcher og Julian Johansen hava tikið út, og hartil eru so fimm nýggir mans eru komnir aftrat.

Í dag klokkan 16 spæla teir fyrsta dystin í Scandinavian Open í Lund í Svøríki, og er hann ímóti Norra. Í morgin klokkan 17 er Svøríki mótstøðuliðið og sunnudagin klokkan 09 er tað Danmark. Dystirnir kunnu síggjast á live.hsf.fo.

Seinni henda mánaðin, frá 17. til 23. august, skulu U19-menninir so til Varna í Bulgaria at spæla EHF Championship-kappingina, sum upprunaliga skuldi verið í fjør. Vinnarin kemur til EM-endaspælið fyri U20 næsta ár og fær eisini møguleikan at spæla seg til HM.

Skráin fyri Scandinavian Open:

Í dag kl. 16.00 Føroyar-Noreg

Í morgin 7. august kl. 17.00 Svøríki-Føroyar

Sunnudagin 8. august kl. 09.00 Føroyar-Danmark

Skráin fyri EHF Championship:

Týsdagin 17. august kl. 16.00 Bulgaria-Føroyar

Hósdagin 19. august kl. 16.00 Kekkia-Føroyar

Leygardagin 21. august og sunnudagin 22. august plaseringsdystir