Anna Dam, forkvinna í H71, fegnast um, at Bygma Balslev hevur játtað at leingja stuðulin til felagið, og hon leggur dent á, hvussu umráðandi tað er fyri felagið at hava góðar og støðugar stuðlar.

– Tað er eisini av stórum týdningi, at vit sum felag vita, hvørjar karmar vit hava at virka undir í eitt longri tíðarskeið, sigur hon.

Sjúrður Olsen, stjóri í Bygma Balslev, sigur at tey sum fyritøka eru fegin um at sleppa at stuðla einum vælvirkandi felag sum H71.

– H71 og Bygma Balslev eru grannar og tað hevur týdning fyri Bygma Balslev at vita, at børn og ung í Hoyvík hava eitt gott og fjølbroytt frítíðarlív, og hetta vilja tey fegin verða við til at stuðla, sigur stjórin og leggur aftrat, at tað er ein frægd at síggja hvussu væl skipað og væl rikið, H71 er sum felag.

– Eisini er tað hugtakandi at síggja, hvussu nógv sjálvboðin taka eina hond í í felagnum, sigur Sjúrður Olsen, ið frá sínum royndum sum virkin í ítróttarfelag sjálvur kennir týdningin av, at tað eru fólk í nærumhvørvinum, ið stuðla upp undir arbeiðið í felagnum.