Saman við Janu eru eisini Filip Ilic, flogbóltsspælari hjá ÍF, og Elisabeth Erlendsdottir, svimjari hjá Havnar Svimjifelag, innstillað til heiðurin, ið eitt av teimum trimum fær á Ítróttarfagnaðinum, sum verður leygarkvøldið 5. februar.

Um Janu verður sagt soleiðis í sambandið við innstillingina:

“Jana Mittún, ið er 18 ára gomul og spælir hondbólt á besta kvinnuliðnum hjá H71, hevur kappingarárið 2020-21 av álvara sligið sítt navn fast bæði í Føroyum og uttanlands.

Í februar spældi Jana ein avgerandi leiklut, tá hon og liðfelagarnir í H71 vunnu Faxe Kondi-steypakappingina hjá kvinnunum í eini spennandi finalu ímóti Neistanum, umframt at hon hevur gingið undan í góðu úrslitunum hjá H71 í EHF Europa Cup-kappingini.

Á U19-landsliðnum var hon avgerandi í Championship-kappingini, har hon við 44 málum bleiv næstbesti málskjútti í kappingini.

Í oktober fekk Jana eisini sín allarfyrsta A-landsdyst fyri Føroyar ímóti Rumenina í EM-undankappingini.”

Umframt sjálvan heiðurin, fær Ítróttastjørnuskotið eina peningaupphædd upp á 5.000 krónur. Ítróttafagnaðurin, sum verður á Hotel Hilton leygarkvøldið 5. februar klokkan 20, kann síggjast beinleiðis í sjónvarpinum hjá Kringvarpi Føroya.