Líka so súrt, sum tað var at tapa fyrsta dystin ímóti Luxemburg, líka so søtt var tað at koppa Italia í evstu løtu, fyri síðani at vinda burtur úr Lettlandi í síðsta dystinum! Ikki bara tað, tí soleiðis sum kappingin í høllini á Hálsi háttaði seg, vunnu menninir seg av aftasta upp á fremsta pláss!

Hetta var eisini fyrstu ferð, at nýggi venjarin, Peter Bredsdorff-Larsen, við sínum fólki skuldi royna at flyta landsliðshondbóltin enn longur fram á leið, og ikki kunnu vit siga annað, enn at tað sá gott út, nú royndin at spæla seg víðari eydnaðist til fulnar.

Tilsamans vóru 22 spælarar tiknir út til teir tríggjar dystirnar, men til hvønn dyst skuldu takast út 16 spælarar, so venjararnir millum dystirnar kundu skifta tveir av spælarunum út. Tilsamans sluppu tí 19 ymiskir landsliðsspælarar at royna seg um vikuskiftið – harav allir “okkara”.

Teir síggjast allir frá vinstru á myndini omanfyri: Leivur Mortensen (Odder, Danmark), Jónas Gunnarsson Djurhuus (Viking Stavanger, Norra), Pætur Mikkjalsson (KA, Ísland), Vilhelm Poulsen (Fram, Ísland), Helgi Hildarson Hoydal (Viking Stavanger, Norra), Hákun West av Teigum (Skanderboeg, Danmark), Pauli Mittún (H71), Elias Ellefsen á Skipagøtu (Sävehof, Svøríki), Peter Krogh (H71) og Pauli Jacobsen (H71).

Næsta avbjóðingin er so “play-off”-dystir úti og heima, og har eru dystardagarnir ásettir til 16./17. mars og 19./20. mars. Okkara mótstøðuland verður annaðhvørt Eysturrríki, Hvítarussland, Bosnia, Litava, Norðurmakedonia, Portugal, Slovakia, Slovenia ella Ukraina, og lutakastið verður í ungarska høvuðsstaðnum, Budapest, fríggjadagin 28. januar.