Tað er hondbóltsheimasíðan trok.fo, ið ber hesi tíðindi í dag, at Pauli Mittún hevur skrivað undir tvey ára sáttmála við Kristiansand Topphåndbold. Sáttmálin kann leingjast við einum ári.

Eftir EM-kappingina í Bulgaria í summar, sum Føroyar vunnu, tók áhugin fyri Paula dik á seg, og eftir at hava vitjað felagið í heyst hevur hann nú tikið avgerð um at skriva undir sáttmála, so hann kann byrja yrkisleið sína í Norra.

– Eg eri sera spentur. Tað kennist sera hóskandi til mín. Hetta er eitt lið sum satsar, venur nógv og venur professionelt, sigur Pauli Mittún við trok.fo.

– Og so haldi eg eisini, at norska deildin passar nokk so væl. Tað er høgt støðið, men ikki so høgt, at lopið verður alt ov stórt, sigur hann.

H71 ynskir Paula hjartaliga tillukku við sáttmálanum og bestu eydnu í Kristiansand hesi næstu árini!