Nýggja skiftið hevur gingið rættiliga skjótt fyri seg, skilst á lagnum, tí felagið í skundi hevði brúk fyri kvaliteti í málinum, nú ein málverji gevst vegna barnsburð. Í løtuni er Nykøbing Falster Håndbold nummar seks í bestu donsku deildini.

Annika Fríðheim Petersen hevur veruliga gjørt vart við seg í íslendskum kvinnuhondbólti, har hon ofta hevur fingið rósandi umrøðu eftir góðar dystir í málinum hjá Haukum.

Menningin hevur verið stór tíðina í Íslandi, og sum skilst, er ætlan hennara at halda fram í sama stíli og at menna seg enn meira, nú hon hevur fingið sáttmála í Nykøbing Falster Håndbold fram til summarið 2024.

Í kvøld hevur Annika verið til sína fyrstu venjing saman við nýggju liðfeløgunum, og tá ið Nykøbing Falster Håndbold mikukvøldið spælir ímóti Viborg HK, sum í løtuni er nummar fýra, verður hon við í hópinum.

Vit í H71 kunnu bara gleðast um, at ein av “okkara” tekur seg fram og kemur at spæla í eini enn sterkari hondbóltskapping. Ikki minst kunnu royndirnar hjá Anniku har koma at gagna kvinnulandsliðnum, har hon higartil hevur átta dystir á baki.

Myndin er frá tíðindafundinum í dag, tá ið tey í Nykøbing Falster Håndbold errin kundu kunngera, at tey hava fingið føroyska landsliðsmálverjan í hópin hjá sær.