Landsliðsvenjararnir, Sonni Larsen og Finnur Hansson, hava eitt vakið eyga við H71-kvinnunum, ið eru væl mannaðar á landsliðnum, sum eftir bara trimum døgum skal spæla tvær ferðir ímóti Eysturríki í EM-undankappingini.

Tær fimm frá H71, sum eru tiknar út til landsliðið, síggjast á myndini omanfyri, og frá vinstru eru tær Maria Halsdóttir Weyhe, Lív Bentsdóttir Zachariasen, Vár Bentsdóttir Zachariasen, Jana Mittún og Brynhild Pálsdóttir.

Haraftrat er eisini Annika Fríðheim Petersen, ið júst er flutt úr íslendskum hondbólti til Nykøbing Falster Håndbold í Danmark, eisini tikin út, so seks av teimum 16 hava sínar góðu hondbóltsrøtur í Hoyvík!

Fyrst skal kvinnulandsliðið á heimavølli taka ímóti Eysturríki í høllini á Hálsi í Havn mikukvøldið 2. mars klokkan 19, og síðani verður útidysturin spældur leygardagin 5. mars klokkan 16.30 í Maria Enzerdorf í Eysturríki.

Støðan í bólki 2 í EM-undankappingini er eftir tveir dystir tann, at Danmark er á odda við 4 stigum, Rumenia hevur trý, Eysturríki eitt og Føroyar enn einki stig.