Menninir vunnu við heili trettan málum og lótu ongantíð nakran iva vera um, at teir ætlaðu sær at vinna í Badmintonhøllini í Klaksvík, har Team Klaksvík tók ímóti. Nokk so stuttligt, at Pauli Jacobsen var okkara toppskjútti fyrstu seks minuttirnar, og at báðir málmenninir hjá okkum komu at teljast millum málskjúttarnar!

Sum dystinum leið, økti H71 alsamt um sína tryggu leiðslu, so einki var at koma eftir hjá Team Klaksvík, hóast vertirnir royndu sítt besta. Tað var serliga rundan um korterið í seinna hálvleiki, at munurin øktist, og hóast tað vildi verið nóg mikið bara at vunnið, vísti stórsigurin sjálvsálit, sum altíð er gott at eiga í sínum parti.

1. hálvfinala – menn:

Team Klaksvík-H71 20-33 (10-16)

Málskjúttar: Óli Mittún 8, Pætur Thomsen 8, Janus Dam Djurhuus 4, Pauli Mittún 4, Bogi Hansen 2, Ári Egason Dam 1, Poul Símun í Garði 1, Pauli Jacobsen 1, Peter Krogh 1, Pætur Mikkjalsson 1, Rói Ellefsen á Skipagøtu 1, Rókur Ziskason 1

Óivað mundu tey flestu vænta ein heilt øðrvísi dyst hjá kvinnunum aftaná, tá ið Stjørnan í KÍ-høllini tók ímóti H71, tí munurin í teimum trimum undanfarnu landskappingardystunum hevur verið so lítil, men tað skuldi í veruleikanum vísa seg, at hetta gjørdist tann higartil minst javni dysturin millum liðini.

At byrja við fylgdust tey, men so fór H71 tvey og trý mál framum, og hóast Stjørnan seinna part av fyrra hálvleiki hevði hug til at steðga H71 eina løtu, avgjørdu seinastu fáu minuttirnir undan steðginum í veruleikanum dystin, tá ið okkara fóru frá 13-15 upp til í 13-18.

Hesa leiðsluna hevði H71 ongar trupulleikar við at halda í seinna hálvleiki, so tí fekst eisini í hesum dystinum eitt gott útgangsstøði undan dystunum sunnudagin. Tá verður spælt í Hoyvíkshøllini, og tað verður tað eisini í næstu viku, um neyðugt verður við nakrari triðju finalu millum liðini.

1. hálvfinala – kvinnur:

Stjørnan-H71 26-32 (13-18)

Málskjúttar: Jana Mittún 9, Rannvá Olsen 9, Maria Halsdóttir Weyhe 6, Elsa Egholm 4, Guðrið Bogadóttir á Borg 2, Lív Bentsdóttir Zachariasen 1, Lív Bentsdóttir Zachariasen 1