Tíbetur fekk dysturin kortini rætta vinnaran, tí hetta var ein av teimum sigrunum, H71-kvinnurnar veruliga høvdu uppiborið. Í verjuni høvdu tær gott tak á Neistanum, og í álopinum fekst tað burturúr, sum skuldi koma burturúr.

Fyrri hálvleikur var merktur av einum tryggum og disiplineraðum innsatsi, ið var merktur av sera fáum villum, men hinvegin góðum hugflogi og góðum spæli. Ikki minst var stuttligt at síggja, hvussu væl vengurnir fingu burturúr.

Mundi farið fyri skjeytið

H71 var á odda við fimm málum, tá ið komið var til hálvleiks, men hóast tað sá út sum ein trygg leiðsla, mundi hon farið fyri skjeytið einar tvær ferðir eftir steðgin, tá ið Neistin fekk minkað munin niður í tvey mál.

Tíbetur eydnaðist at fáa alt upp á rættkjøl aftur hvørja ferð, so beinleiðis vandi ikki stóðst av. Og við góða spælinum, H71 vísti í kvøld, eru vónirnar avgjørt góðar undan aðru finaluni, sum verður í høllini á Hálsi týskvøldið.

At H71 fekk seks útvísingar og Neistin bara tríggjar, sigur einki um hart spæl, men meira um ivasama leiðslu…

1. FM-finala, kvinnur:

H71-Neistin 29-24 (16-11)

Málskjúttar: Jana Mittún 10, Rannvá Olsen 6, Guðrið Bogadóttir á Borg 4, Maria Halsdóttir Weyhe 3, Vár Bentsdóttir Zachariasen 3, Brynhild Pálsdóttir 2, Marita Mortensen 1