FM-finalurnar verða spældar soleiðis, at tað ræður um at vera best í fimm dystum, sum so aftur merkir, at tað liðið, ið fyrst hevur vunnið tríggjar dystir, er meistari.

H71-kvinnurnar hava nú vunnið tveir, og innsatsurin verður bara meira sannførandi fyri hvønn dyst, og í kvøld var Neistin ikki í nánd av at hótta okkara kvinnur. Í veruleikanum var H71 ein klassa betri!

Neistin var onga løtu í dystinum frammanfyri, og einastu ferð tað stóð á jøvnum, var við 1-1. Enn einaferð vísti H71 sera disiplinerað spæl og risti ikki á hondunum, nú tað var so umráðandi at tryggja sær sjálvum besta útgangsstøði undan triðja dystinum.

Einki er liðugt fyrr enn alt er liðugt, verður tikið til, men við so stórari yvirvág, sum vit sóu í kvøld, hevur H71 í øllum førum møguleikan at avgera kappingina við egnum mátti og egnari megi longu leygarkvøldið.

Tá møtast H71 og Neistin í triðja dystinum, sum verður í Hoyvíkshøllini klokkan 17, og kann hetta eisini gerast tann seinasti hjá kvinnunum hetta kappingarárið…

2. FM-finala, kvinnur:

Neistin-H71 19-26 (8-15)

Málskjúttar: Maria Halsdóttir Weyhe 7, Rannvá Olsen 6, Marita Mortensen 5, Guðrið Bogadóttir á Borg 3, Jana Mittún 3, Bjørk Brimnes 1, Elsa Egholm 1