Hetta gjørdist greitt, tá ið H71 aftur – væl borið fram av góðum stuðlum og fjepparum – í aðru FM-finaluni vann ein tryggan og sera sannførandi sigur á kollfirðingum, ið tó royndu at gera sítt til, at tað ikki skuldi gerast alt ov lætt.

Sum í dystinum sunnudagin byrjaði tað rímiliga javnt, men H71 var tó liðið, ið hevði hug at renna undan, og beinanvegin var ein lítil leiðsla har. H71 slapp ikki ordiliga avstað beinanvegin, men tó lá í luftini, hvønn veg tað skuldi bera.

Pauli stóri munurin

Síðstu 10 minuttirnar av fyrra hálvleiki eydnaðist so H71 at leggja sjógv millum seg og KÍF, og enn einaferð var Pauli í málinum helst stóri munurin á liðunum, tá ið hann mestsum hevði hug at stongja málið í løtum.

Hálvleiksleiðslan upp á átta mál helt sær so at siga allan seinna hálvleik, og ta einu løtuni lúrdi enn ein tíggjumálssigur, men ímóti endanum fekk KÍF pyntað eitt sindur um úrslitið.

Hvussu er og ikki, so er stórur møguleiki fyri, alt verður avgjørt leygarkvøldið, tá liðini hittast aftur í Hoyvíkshøllini. Vit fegnast bara um at hava eitt gott lið, sum í øllum førum hevur uppiborið at fara allan vegin – og helst eisini ger tað!

2. FM-finala, menn:

KÍF-H71 25-32 (8-16)

Málskjúttar: Pætur Thomsen 8, Pauli Mittún 5, Janus Dam Djurhuus 4, Peter Krogh 4, Óli Mittún 4, Pætur Mikkjalsson 3, Rói Ellefsen á Skipagøtu 2, Poul Símun í Garði 1, Sveinur Olafsson 1