Dysturin verður spældur á miðdegi, og umframt at hann kann síggjast í sjónvarpinum, verður hann eisini vístur á stórskíggja í Vágsbotni, har trappan mangan hevur verið karmur um góðar dystir.

Vælvitandi, at mótstøðan er hørð frá fyrstu løtu, tí Føroyar eru í einum krútsterkum bólki, kunnu vit eisini taka orðini hjá spælarunum fyri góða vøru: “Jamen, vit eru eisini góðir!”

Sum sagt, er fyrsti dysturin í dag ímóti Danmark, og í morgin eitur mótstøðan Slovenia og sunnudagin Ungarn. Allir dystirnir verða spældir klokkan 12.

Vit gleða okkum at síggja okkara evnaríku framtíðarspælarar í hesum dystunum og vónandi fleiri aftrat í EM-endaspælinum. Ikki verri, sæð við okkara brillum, at H71 líkasum eigur bulin á liðnum!

Fyri trimum árum síðani sóu vit í Göteborg, hvat hesir ungu knassarnir kunnu dríva tað til, tá ið teir sum U17-lið vunnu Europea Open í kapping við 24 aðrar tjóðir.

Koyr á, Føroyar!