Dysturin var ímóti danska felagnum, Hjortshøj Egå, sum hevði staðið seg sera væl í kappingini, men hóast finalan í løtum kundi síggja jøvn út, høvdu okkara munin allatíðina.

Í hálvleikinum var H71 á odda við einum máli, 8-7, so tað kundi tykjast opið, men nokk so skjótt byrjaði tað at líkjast einum H71-sigri, ið ikki lættliga kundi hóttast.

Danska liðið royndi av øllum alvi at andøva ímóti, men tað eydnaðist ongantíð at finna lykilin til verjuna hjá H71, sum helt Hjortshøj Egå so mikið frá sær, at tvey mál vóru á muni til endans. H71 vann 13-11.

Eftir dystin segði ein av venjarunum, Simon Olsen, við heimasíðuna hjá Partille Cup, at hetta hevði verið ein frálík vika við góðum hýri, og at tað var fantastiska at sleppa at krýna avrikið við at vinna gull.

Í sambandi við kappingina hevur Simon havt Jákup Símun Simonsen og Alfred Jacobsen aftur at sær sum venjarar.

Ikki færri enn 1.067 hondbóltslið úr 31 tjóðum hava hesa vikuna kappast á tilsamans 56 vøllum í Partille.