Hoyvíkskvinnur løgdu sera væl frá landi. Í verjuni byrjaðu vertirnir í nú tiltiknu 5-1 verjuni við Elidu Joensen í broddinum. Verjan stóð seg væl ímóti ágangandi kyndilsálopinum, sum setti ferð á frá byrjan.

Í álopinum koyrdi spælið hjá vertunum við Onnu E. H. Weyhe, Mariu Weyhe og Elsu Egholm í bak-ketuni sera væl. Hoyvíkskvinnur vunnu sínar dystir og spældu seg til góðar støður í nærum hvørjum álopi, meðan neyvleikin í avgreiðsluløtunum var framúr.

Tá ið átta minuttir vóru leiktir, høvdu vertirnir lagt seg á odda við trimum málum, 7-4 til H71.

So steðgaði alt upp hjá vertunum. Villur fóru at gera nógv um seg í álopinum, og funnu hoyvíkskvinnur als ikki stevið. Tá ið tær megnaðu at finna op, so restaði neyvleikin, og rann H71 seg inn í ein málturk, ið vardi heilar fjúrtan minuttir.

Hoyvíksverjan megnaði tó framhaldandi at basa gestunum, ið eisini vóru plágaðir av villum. H71-verjan trýsti og órógvaði spælið hjá teimum grønu, sum eiheldur reiðiliga megnaðu at finna stevið.
Samanumtikið var hetta lítla korterið ikki ein pen umboðan fyri ársins FM-finalur, ið annars hava borðreitt við nógvum góðum.

Tá ið níggju minuttir restaðu í av fyrra hálvleiki, høvdu gestirnir drigið H71 leiðsluna inn, 7-7.

Eftir hetta komu hoyvíkskvinnurnar í gongd aftur. Verjan helt fram við at trýsta gestirnar til villur og keðiligar skotstøður.  Nú fingu hoyvíkskvinnur eisini gongd á kontraspælið, har tær eydnaðust væl við at finna Karin Egholm, ið var eirindaleys, tá ið á stóð.

Eisini í skipaða álopspælinum funnu vertirnir betri taktir við góðum fríspælingum til vengur og striku, og fóru tær svartklæddu nú aftur at draga frá.

Tá ið liðini fóru til hálvleiks, høvdu vertirnir tikið eina trý-máls leiðslu, 12-9 til H71.

Kyndil átti fyrstu løtuna eftir steðgin. Hoyvíkskvinnur blakaðu eitt ótal av bóltum burtur fyrstu løtuna, ið gav gestunum møguleikar til skjótálop hinvegin. Tá ið hoyvíkskvinnur megnaðu at spæla við neyvleika, so komu tær tó til góðar støður í so at siga hvørjum føri.

Í verjuni misti H71 samstundis takið, og fingu kyndilskvinnur glið á.

Tá ið annar hálvleikur var tíggju minuttir gamal, stóð á jøvnum, 16-16.

H71 tók ræðið aftur eftir hetta. Við einari stinnari 5-1 verju og einari árvaknari Rúnu J. Larsen í málinum tóku hoyvíkskvinnur broddin av teimum grønu.

Í hinum endanum fingu gestirnir glið á. Serliga eydnaðust hoyvíkskvinnur væl við at finna Tóru Róadóttir og Brynhild Pálsdóttir á vengrunum, meðan Anna E. H. Weyhe gav miðblokkinum hjá Kyndil høvuðbrýggj.

H71 fór at draga frá, og tá ið átta minuttir restaðu í, vóru tað fýra mál, ið skiltu partarnar, 23-19 til H71.

Kyndil svaraði tó skjótt aftur við einari ágangandi verju og skjótum álopspæli. Hoyvíkskvinnur megnaðu als ikki at standa ímóti, og tá ið hálvurannar minuttur var eftir at leika, var tað bert eitt mál á muni, 24-23 til H71.

Gestirnir fóru heilt fram á vøllin at verja, og vóru hoyvíkskvinnur undir stórum trýsti. H71 hevði ilt við at finna eitt mótsvar, men so tók Maria H. Weyhe sakina í egnar hendur. Sum ein einstaklingaherur rak hon niðan gjøgnum vøllin, sneiddi sær gjøgnum kyndilsverjuna og setti síðan bóltin trygt í netið.

25-23 til H71 og ein stórur minuttur eftir at leika.

Kyndil svaraði tó skjótt aftur, og tá ið fjøruti sekund restaðu í, var tað aftur bert eitt mál á muni, 25-24 til H71.

Aftur kom Kyndil langt fram at verja, aftur stríddust hoyvíkskvinnur, og aftur var tað Maria H. Weyhe, ið gekk á odda. Enn einaferð rak hon einsamøll niðan eftir vøllinum, og stríddi hon seg hesaferð til eitt brotskast.

Anna E. H. Weyhe fekk álitið frá sjey metrum, og hon sveik ikki! Hon setti bóltin í netið til 26-24 og kvaldi síðsta neistan í kyndlinum.

H71 ER FØROYAMEISTARI HJÁ KVINNUM!

Málskjúttar hjá H71:
Anna E. H. Weyhe (7), Maria H. Weyhe (5), Karin Egholm (4), Elsa Egholm (3), Brynhild Pálsdóttir (3), Tóra Róadóttir (2) og Lea S. L. Brockie (2).

Eftir er bara at takka øllum fyri eitt frálíkt kappingarár.

Dómaraseðilin kanst tú síggja her.

Myndir eru á Portal.fo (Jens Kristjan Vang)