Tað eydnaðist ikki at halda lív í vónini at koma í finaluna, hóast StÍf vann á KÍF. Vunnu vit á VÍF, vildu vit framvegis havt møguleikan, men vit tóku ikki av. Finaluplássini eru farin til VÍF og KÍF.

Tað vóru ikki mong, sum høvdu leitað sær í høllina í Vestmanna í gjárkvøldið. Vestmenningar eru longu í finaluhýri, og viðhaldsfólkið hjá H71 mundu ikki trúgva so nógv uppá møguleikan hjá H71, tí har vóru ikki nógvir hoyvíkingar. Spælararnir mundu heldur ikki trúgva so nógv upp tað, tí har var ikki tann heilt stóri stríðsviljin.

Dysturin gekk yvirhøvur javnt á, men við eini lítlari yvirvág til vestmenningar. Í seinna hálvleiki vóru eina løtu fimm mál á muni, 20-15. Tá kom rættiligur spenningur í, tí VÍF fekk eina røð av dupultútvísingum, sum gjørdu, at tað eftir eini løtu stóð á jøvnum 22-22. Dysturin kundi koppa um hetta mundi, men vit megnaðu ikki at halda tætt í verjuni, samstundis sum fleiri atsóknir endaðu málleysar. VÍF streyk av stað og vann at enda 27-24.

Við hesum spæla vit ikki meiri um føroyameistaraskapin 2013/14 men meiri um 3. og 4. plássið.
Dysturin gekk sum heild ikki serliga væl, tað var ikki nóg gott, hvørki í verju ella álopi. Mest eyðsýndur í dag var Rúni Højgaard, sum legði gott press á VÍF verjuna, og fekk 4 mál. Bestur at skjóta mál var Jónas Djurhuus, ið fekk 5 mál.