Nú hevur gingið væl hjá H71, vit høvdu vunnið tríggjar teir seinastu dystirnar, og spennandi var tí at síggja, um góða gongdin hevði hald í nøkrum grundleggjandi stabilum, ella tað bara vóru tríggir tilvildarligir sigrar, ið komu samstundis. Tíbetur sær út til, at vit hava funnið góða hondbóltsstevið, og vit vunnu eisini ein reiðiliga tryggan sigur á strandingum í dag.

Dystargongd

Tað kann altíð kjakast um, um StÍF bara vóru vánaligir í fyrra hálvleiki, ella um tað vóru H71-ararnir, sum við sínum spæli gjørdu, at onki eydnaðist hjá heimaliðnum. Tað var beinanveg at munur sást á máltalvuni. H71 hildu fram við góða hugburðinum frá seinasta dysti og vardu sum úlvur á skóg. Verjan var stinn, og málmennirnir báðir vóru aftur í dag fantastiskir, serliga væl gekk hjá Hanusi. 10 min: 1-5, 20 min: 3-7 og 30 min: 6-12 (júst sum ímóti Team Klaksvík).

Seks mál frammanfyri við hálvleik er gott útgangsstøði, men í hondbólti er tó onki avgjørt, tað hava vit so mangan sæð fyrr. Í dystinum móti klaksvíkingum var díkt á minst líka so nógv í seinna hálvleiki sum í tí fyrra, menn surfaðu á einum megnar viðgongdsbroti, og stuttleikaðu sær óført og vístu kynstur. Í dag var ikki sama gongd. Menn fóru at spæla drálhondbólt frá byrjan av seinna hálvleiki, ella sum onkur segði “hví spæla teir við hondbremsuni uppi”. Hetta kann skjótt gerast vandamikið, minni trýst frá okkum og eitt sindur meiri trýst og ágangur frá heimaliðum, so er skjótt, at tað steðgar upp. Hetta hendi tíbetur ikki, men tað sást ein farri av hóttan, tí støðan batnaði hjá StÍF. Tá 45 min. vóru leiktir, var munurin komin niður á 3 mál, 14-17. Vit vunnu tó dystin við fýra málum. Endastøðan gjørdist 24-20 til H71.

Ein góður sigur, tí tað er ofta torført hjá H71 at fáa stig á Skála. Hóskvøldið verður leikt ímóti Neistanum, og tá er avgerandi neyðugt, at menn fáa rætta hugburðin til at basa bláu grannunum, tí teir hava roynst okkum sera illa seinastu árini.

Vit hava nú leikt ¼ av kappingini og vit liggja nr. 2, so ikki kann sigast annað enn, at tað gongur væl.

Dómaraseðil.